Танилцуулга

XX зууны манлай бүтээн байгуулалт Эрдэнэт хот 1976 оны нэгдүгээр сарын нэгэнд байгуулагдаж Монгол Улсын гурав дахь том хот болсон түүхтэй. 1994 онд нутаг дэвсгэр, засаг, захиргааны нэгжийн өөрчлөлтөөр Орхон аймаг болж Баян-Өндөр, Жаргалант гэсэн хоёр сумтай болсон. Өдгөө 100 гаруй мянган хүн амтай. 24 багт 28 мянга гаруй өрх айл амьдарч байна. Хүн амын жилийн дундаж өсөлт 2.2 хувь буюу нийт хүн амын 63.9 хувийг залуучууд эзэлдэг юм. 

Дэд бүтэц 

Эрдэнэт хот Зам тээвэр, мэдээлэл харилцаа холбоо, дэд бүтэц сайтай аймгуудын томоохон төлөөлөл. ОХУ,  БНХАУ-тай төмөр замаар холбогдсон.  Мөн нийслэл Улаанбаатар, аж үйлдвэрийн томоохон  Дархан хоттой  төмөр зам болон авто замаар холбогдсон бөгөөд УБ-аас Булган Хөвсгөл чиглэлд мянганы замаар дамжин өнгөрдөг  дэд бүтэцжсэн газар юм. 

Аж үйлдвэр

Жилдээ 26 сая тонн зэс, молибдений баяжмал, уурхайн тэсэлгээний бодис үйлдвэрлэх болон зэсийн хүдэр бутлах ган бөмбөлөгний үйлдвэр ажилладаг. Мөн өнгөт металлын, хүнсний, мод боловсруулах, хивсний зэрэг хөнгөн үйлдвэрүүдтэй, соёл урлаг, боловсрол, эмнэлэг, үйлчилгээний газруудтай томоохон хэмжээний аж үйлдвэрийн хот юм.  

Эрүүл мэнд

Орхон аймаг нь эрүүл мэндийн салбарын хувьд төвийн бүсийн аймгуудыг хамарсан Бүсийн оношилгоо эмчилгээний төвтэй Булган, Дархан, Сэлэнгэ, Архангай, Хөвсгөл зэрэг аймгуудуудын иргэдэд эрүүл мэндийн цогц тусламж үйлчилгээг үзүүлж байна. Эрдэнэт сувилал, Баян-Өндөр мед, Эрдэнэт медикал  зэрэг томоохон эмнэлгүүд үйл ажиллагаа явуулахаас гадна 60 гаруй эрүүл мэндийн үйлчилгээний байгууллагууд ажиллаж байна. Эрдэнэт медикал төрөлжсөн мэргэшлийн эмнэлэг нь олон улсын стандартын дагуу баригдсан 6800 м.кв 7 давхар эмнэлэгийн барилгатай сүүлийн үеийн оношилгоо эмчилгээний дэвшилтэт тоног төхөөрөмжөөр дэлхийн жишигт нийцсэн оношилгооны цогц үйлчилгээг нэг дороос үзүүлэх гадаад дотоодын хяналтанд бүрэн хамрагдсан лаборатори, бүрэн автомат ариутгалын тасаг бүхий эмнэлэг ажиллаж байна. 

Боловсролын түвшин

Тус аймагт ШУТИС-ийн харьяа, Ш.Отгонбилэгийн нэрэмжит технологийн сургууль, Монгол Улсын Их Сургууль, Улс төрийн академи, Маргад дээд сургууль зэрэг их, дээд сургууль ажиллаж байна. Аймгийн хэмжээнд 23 Ерөнхий боловсролын сургууль болон хувийн хэвшлийн Эрдмийн сан, Цайхун,Билигт Ѳргѳѳ, Орхон Эмпати сургуулиуд үйл ажиллагаагаа явуулж байна.

Аялал жуулчлал-Соёл ахуй

Хүүхэд залуучуудыг соён гэгээрүүлэхэд чиглэсэн  Хүүхэд Залуучуудын Ордон, Гэр бүлийн Ордон, Хангарьд спорт Ордон, Уурхайчин Соёлын Ордон, Хүүхэд залуучуудын театр, Номын сан, кино театрууд, Эрдэнэт Хотын түүхэн хөгжил, соёлыг илтгэсэн 20 гаруй  хөшөө дурсгал, 3 одтой 2 зочид буудал, 1 одтой 1 зочид  буудал, 2 цэцэгийн зэрэгтэй 1 амралтын бааз, орчин үеийн ресторан зоогийн газар, кофе шоп шинээр нээгдэж үйл ажиллагаа явуулж байна.

Эрдэнэсийн өлгий, эх орны тулгуур багана Эрдэнэт хотод тавтай морил.

Байршил

Холбоотой зургууд