Монгол- Зөвлөлтийн найрамдлын Эрдэнэт хотын удирдлагууд 1981 оны 12 сард хоёр орны хамтын ажиллагааг бэлгэдсэн "Найрамдал" дурсгалын цогцолборыг барих шийдвэрийг гаргаж, 1986 оны 01 сарын 10-нд Зөвлөлтийн 10 жилийн ойгоор анхны шавыг тавьж нээлт хийсэн байна.1987 оны зун Монгол-Зөвлөлтийн залуучуудын найрамдлын VIII их наадмын үеэр Д.Майдарын зураглалаар "Найрамдал" өндөрлөгийг босгож, бүхэлд нь нээжээ. "Найрамдал" өндөрлөг далайн түвшнээс 1,340 метрийн өндөрт 1,7 га талбайд оршдог. Хоёр гар дээр өргөгдсөн, үйлдвэрийн том араа нь Монгол-Оросын ард түмний хамтын хүч, хөдөлмөрөөр бий болсон их бүтээн байгуулалтыг бахархан бэлгэдсэн утгатай юм. Уг хөшөөг 2010, 2014, 2015 онд "Эрдэнэт үйлдвэр" ХХК-ний засвар механикийн заводын засварын цехийн ажилчид сэргээн засварлажээ. Тэд 1 метрийн диаметртэй, 7-10 см зузаантай гууль болон зэсэн хавтгайгаар үйлдвэр болон Эрдэнэт хотын лого, одон тэмдгийг урлаж, араануудын дунд байрлуулан гоёжээ. 2014 онд МУСТА зураач Төмөрийн хүсэлтийг дэмжиж, өндөрлөгийн арааны дотор талд 3 зураачийн бүтээлээр Монголын сүлд, 2 орны ард түмний бэлгэдэл мөнгөн аягатай сүү, хадаг барьсан монгол эмэгтэй, болон давс, талх барьсан орос эмэгтэй, Монгол Зөвлөлтийн ажилчин залуус, төрийн шагнал, монгол ахуй, үйлдвэрийн сэдэвт 30*60 хэмжээтэй, Орос, Монгол уурхайчдын эв найрамдал, бүтээлч хөдөлмөрийг бэлгэдсэн шигтгэмэл чимэглэлийг плитагаар хийж гоёсон байна. Өндөрлөгийн өмнө "Найрамдал-Дружба" гэсэн бичээс байдаг бөгөөд өндөрлөгийг тойруулан хийсэн дугуй талбайд сандал байрлуулж, цогцолборын эргэн тойронд түүхэн үйл явдлын зураг, чимэглэл бүхий самбарууд босгож, мод тарьж цэцэрлэгжүүлэлт хийж тохижуулсан байна. 

Энэ цогцолбор "Эрдэнэт үйлдвэр" ХХК-аас Эрдэнэт хот орох замын хойд талд хүний нүдэнд ил харагдах газарт байрласан байна.

Холбоотой зургууд